سەرەکی / تۆپ ستۆر / مەلا بختیار: هۆشیاری ئەقڵ بەکودەتا و بە زەبرو زەنگ نابێ، بەڵکو ئەمە پرۆسێسێکی مێژووییە، خوێندنەوەیە، رەخنەیە، ململانێیە، پەروەردەکردنە، رێکخراو دروستکردن و پشوودریژییە

مەلا بختیار: هۆشیاری ئەقڵ بەکودەتا و بە زەبرو زەنگ نابێ، بەڵکو ئەمە پرۆسێسێکی مێژووییە، خوێندنەوەیە، رەخنەیە، ململانێیە، پەروەردەکردنە، رێکخراو دروستکردن و پشوودریژییە

“هەر لەسەرەتاوە هەوڵدرا دابڕان لە بێشکەدا بنێژن!”

مەلا بەختیار:
ئەگەر خەمێکی گەورەمان نەبوایە،
چۆن دەمانتوانی بەرگەی ئەم هەموو دژایەتییە بگرین؟

ژمارەیەک گەنجان و لاوانی کفری، بەنوێنەرایەتی رێکخراوی تیشکی رۆشنگەری، سەردانی سیاسەتمدار و رۆشنگەر مەلا بەختیار دەکەن و لە دیدارێکی کراوەشدا، کە پێش نیوەڕۆی ئەمڕۆ (١٥/٦/٢٠٢٢) بەڕێوەچوو، گفتوگۆ لەبارەی بەرنامەی کاری رێکخراوەکە و چۆنێتی خەباتی دیموکراسی و رۆشنگەرانە و چالاکییەکانی پلاتفۆرمی دابڕانیش کرا.
لەدەستپێکی گفتوگۆکەشدا، نوێنەرانی رێکخراوی تیشکی رۆشنگەری، تێڕوانین و سەرنجەکانی خۆیان، پێویستی زۆرتری ئامادەیی خەباتی دیموکراسی و رۆشنگەرانە لە پێناو هۆشیاری زیاتری کۆمەڵ و چۆنێتی رووبەڕبونەوەی ئەقڵی فیودالیزم و فێندەمێنتالیستی لە کوردستان بەگشتی و دەڤەری گەرمیان و کفری بەتایبەتی کرا و لەو رووەشەوە پێویستی زیاتری هاوکاریی و پشتیوانییەکانیان ئاراستەی سەرپەرشتیاری گشتی پلاتفۆڕمی دابڕان کرد، لەپێناو گەشانەوەی زیاتری ئەقل و هۆشیاری لای تاک و کۆی کۆمەڵ.
لەبەرامبەریشدا، مەلا بەختیار، رۆشنگەر و سەرپەرشتیاری دابڕان، خەمی بەردەوامی خەباتی دیموکراسی و رۆشنگەری، ئازادییەکانی تاک و یەکسانی ژن و پیاو، بە بەشێکی گەورە لەخەمی خۆی ناوبردو ئاماژەی بۆ ئەوەکرد:
لە دروستکردنی پلاتفۆرمی دابڕانەوە تا ئێستا بەتایبەت، بەبێئەوەی هیچ پشتیوانی و سەپۆرتێکی مادی دیاریکراومان هەبێ و بەڵام بەردەوامیشین، سەلمێنەری راستیی ئەو پەرۆشییەیە، کە لەپێناو گەیشتن بەئامانجەکان، شانمان داوەتە بەر چ خەمێکی گەورە، کە خەمی هۆشیاری تاک و کۆی کۆمەڵە.
مەلا بەختیار، جەختیشیکردوە: دروستکردنی دابڕان بۆ هیچ مەرام و مەبەستێک نەبووە، ئەگەرچی لەسەرەتاوە هەبوون بە مەرام تەفسیر و لێکدانەوەی جیاوازیان بۆ دەکرد، بەڵام دوای حەوت ساڵ خەباتی دیموکراسی و رۆشنگەری، هەموو ئەو فاڵانەمان بەتاڵکردەوە ، سەلماندمان سەرەڕای جیاوازییە ئایدۆلۆژییەکان، دابڕان لەپێناو دابڕان و رۆشنگەرییەدایە و بەس!
رونیشیکردەوە: ئەمە داهێنراوی مەلا بەختیار نییە، بەڵکو ئەمە راستییەکی مێژووییە کە دیموکراسی بەبێ رۆشنگەری بونیاد نانرێت! بەڵکو مەحاڵە بەبێ رۆشنگەری ئەقڵ ئازاد و رۆشنبێ! بیرو بۆچونەکانیش، لە سەدەکانی ناوەڕاست و چەقبەستن ئازادبێ!
وتیشی: رۆشنگەری و هۆشیاری ئەقڵ بەکودەتا و بە زەبرو زەنگ نابێ، بەڵکو ئەمە پرۆسێسێکی مێژووییە، خوێندنەوەیە، رەخنەیە، ململانێیە، پەروەردەکردنە، رێکخراو دروستکردن و پشوودریژییە، بەرگەگرتنی هەموو پەرچە کردارەکان! ئەگەرنا هەر لەسەرەتاوە هەوڵدرا دابڕان لە بێشکەدا بنێژن! ئەمە ئەگەر پرسێکی گەورە و خەمێکی گەورەی لەپشتی دابڕانەوە نەبێ، چۆن دەمانتوانی بەرگەی ئەم هەموو ململانێ و دژایەتییە بگرین؟
بەخوێندنەوەی سەردەمی ئێستا و قۆناغەکە، مەلا بەختیار، روئیا و ستراتیژی نوێی خەباتی رۆشنگەری و دیموکراسی رونتر کردەوەو جەختیشی لەهەر جۆرە پشتیوانیەک لەوپێناوەدا کردەوە، بە تایبەت بۆ رێکخراوی تیشکی رۆشنگەری و بەردەوامی زیاتری کاروچالاکییەکانیان و خزمەتەکانیان بەتاک و کۆی دانیشتوانی شاری کفری، کە بە شارێکی گرنگ و خاوەن مێژوو و خۆشەویستیشی ناوبرد.

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *