سەرەکی / تۆپ ستۆر / مەلا بەختیار: كارەساتە حزب‌و دەسەڵات گۆڕانکاری ئەنجام نەدەن

مەلا بەختیار: كارەساتە حزب‌و دەسەڵات گۆڕانکاری ئەنجام نەدەن

 

 

مەلا بەختیار:

كاتێك كۆمەڵ‌و رێكخراوەكان دەگۆڕێن، بێگومان دەبێ‌ حزبیش بگۆڕێت، نەك بچەقێت!

ئەمڕۆ (27/5/2019) ماڵپەڕی قەندیل 24، سەردانی مەلا بەختیار، لێپرسراوی دەستەی كارگێڕیان كردو لەدیدارێكیشدا مەلا بەختیار، پاشئەوە بەگەرمی پیرۆزبایی ئاراستەی رێكخراوی ئازادی لاوانی كوردستان كردو ئومێدیخواست ئەو رێكخراوە، كە لەسەرەتاوە ویسترا رێكخراوێكی نوێ‌ بێ‌ لەچا‌و رێكخراوەكانی تر، بەڵام ئێستا بەهۆی قەیرانی داراییەوە تاڕادەیەك لەچالاكی كەوتوون، بەڵام لەچالاكی ئەقڵ، گۆڕانكاری نەكەون‌و پێویستە ئەو رێكخراوە كە بەستراتیج‌و پرۆژەیەكی نوێ‌ هاتە كایەوە‌و لەنوكەوە ئاگادار‌و دەستم هەبووە لەدامەزراندنەكەی‌و لەنوسینی بەرنامەو دروشمەكانی، ئومێدەوارم ئەو گۆڕانكاریانەی كە هەیە، یادەكەیان بقۆزنەوە بۆ ئەوەی رێكخراوێك بن بۆ ئەم سەردەمە، نەك رێكخراوێك بن لەسەردەمی رابردوو، هاوكات لەبارەی كاریگەرییەكانی تەكنیك‌و تەكنەلۆجیا، ئاماژەی بۆ ئەوەكرد:
جاران، كە لێپرسراوانی سیاسی و حزبەكان لەگەڵ ئەم دەڤەرانە دادەنیشتین، قسەكان ئەوەبوو كە یەكێتی‌و هێزی پێشمەرگە چیدەكەن؟ ناكۆكی نێوان لایەنە سیاسییەكان بەكوێ‌ گەیشتووە؟ حوكمڕانییەكەمان چۆن بێ‌‌و چۆن نەبێت؟ هەموو كۆبوونەوەو هەواڵ‌و تێكستە سیاسیەكانی دوای راپەڕین، (چونكە پێش راپەڕین هەمووی شۆڕشگێڕانە بوون)، هەموبۆچونەكان لەقاڵبێكی سیاسی، یان ئەو پەڕی لەقاڵبی ئەو رێكخراوانەدا بوون كە سەر بەحزبێكی سیاسی بوون. وتارەكانیشمان تا ساڵی (1999 و 2000) بەهەمانشێوەبوون. بەڵام دواتر رەهەندی وتارو بۆچوون‌و پەیوەندییەكانی كۆمەڵایەتی، گۆڕانیان بەسەرداهات. بەهۆی ئەوەشی ئینتەرنێت لەساڵی (1994) هاتە كوردستانەوەو وردە وردە لەراگەیاندن كاریگەرییەكانی رەنگیاندایەوە، بەڵام كاریگەرییەكانیش ئەوەندەی تەكنیكی بوون، مەعریفی نەبوون. ئەوەندەی زانیاری بوو، ئەوەندە كاریگەرییەكانی كۆمەڵایەتی، لەسەر خێزان‌و هەست‌و هەڵوێستی  تاك‌و سەرەنجامیش لەسەر بازاڕ  نەبوون. بەڵام ئێستا بەهۆی گەشەكردنی ئینتەرنێت‌و ئەو هەموو پەلوپۆیەی هەیەتی بەتایبەتی لەسۆشیالمێدیا، ئێستا تاك سەربەخۆیی خۆی وەرگرتووە لەگەڵ سۆسیالمێدیا، بازاڕ تێكەڵبووە لەگەڵ سۆسیالمێدیا، كۆمەڵ بەشێوەیەكی گشتی زۆر كەوتۆتە ژێر كاریگەری سۆشیالمێدیا‌و تەكنیك‌و تەكنەلۆجیای نوێ‌، پاشان كەلتور و پەیوەندیەكانی خەڵك، پەیوەندییەكانی خێزان، تێگەیشتنی باوك بۆ كچ، برا بۆ خوشك، زانكۆ و پەیمانگەكانمان، تەنانەت پرۆگرامی خوێندنگەكانمان هەموویان گۆڕانكاری سەراپایی بەسەردا هاتووە. بۆ نمونە كۆلێجی تەكنیكی و كۆمپیوتەرو پەیمانگەكانیان هەیە، ئەمانەش دیاردەی تازە تازەن كە سەرەنجامی ئەو كاریگەریانە هاتوون، لەدنیادا جیهانگیری و تەكنیك‌و تەكنەلۆجیا بەدییانهێناوە. واتە لەڕوی بابەتییەوە گۆڕانكارییەكان لەكۆمەڵ، لەچینەكان، لەدەسەڵاتەكانی دنیا، لەبازاڕ، لەگیرفان‌و لەویژدانیش رویداوە. هیچ كەسێكیش ناتوانێ‌ بڵێ‌ لەم گۆڕانكاریانە بەدەرم.
لێپرسراوی دەستەی كارگێڕی، ئاماەژی بۆ ئەوەشكرد، كە لێكەوتەی سەرنج‌و تێڕوانینەكانیشی سێ‌ ئاراستەیە، ئەوانیش: ئاراستەی یەك تاك‌و رووناكبیرییە، ئاراستەی دووەم رێكخراوەكان‌و ئێنجی ئۆكانە، ئاراستەی سێهەمیش حزبەكان‌و دەسەڵاتەكانە‌و وتی: لەبارەی تاكەوە، حزب‌و رێكخراو بیەوێ‌ یان نا، تاك كەوتۆتە ژێر كاریگەری گۆڕانكارییەكان‌و سۆشیالمێدیا‌و ئەو رووداوانەی لەسەر ئاستی دنیا خەریكن بنەماكانی كۆمەڵایەتی‌و چینایەتی‌و خێزانیش دەگۆڕن.
رێكخراوەكانیش، هەموو ئەوانەی سەر بەحزب یان لەدەرەوەی حزبن، كە تاك‌و كۆمەڵ گۆڕانیان بەسەردا هاتووە، ئایا رێكخراوەكان، وەكو رێكخراوە بچوكەكانی ئێنجی ئۆ، یان رێكخراوەكانی سەر بەحزب دەبێ‌ چیبكەن؟ هیچ رێگەیەك لەبەردەمی رێكخراو و سەندیكاكان نییە، تەنها دەبێ‌ رێكخراوی ئەم سەردەمە بن. بەرنامە و پێكهاتەو كۆبوونەوەكانیان‌و پەروەردەكانیان، ئامانجەكانیان‌و بگۆڕن‌و گۆڕانكاری لەسەراپا ستراكچەرو فكرو ئاراستەی خۆیان‌و چۆنێتی خەباتی دیموكراسی‌و مەدەنی خۆیان بكەن‌و هیچ رێگەیەكی تر لەبەردەمیاندا نییە. گۆڕانكاری نەكەن هەموویان دەپوكێنەوە.
جەختیشیكردەوە: كاتێك كۆمەڵ‌و رێكخراوەكانیش دەگۆڕێن، بێگومان دەبێ‌ حزبیش بگۆڕێت، نەك بچەقێت! بەڵكو كارەساتە حزب‌و دەسەڵات خۆیان نەگۆڕن،  بەڵكو لەئۆرۆپا لەسەدەی هەژدەو نۆزدەهەم‌و بیستەمەوە، رێكخراوەكان فشاریان دەبرد سەر حكومەت گۆڕانكاری دروست بكەن. بەڵام ئێستا بەپێچەوانەوە، جیهانگیری حكومەتەكان‌و كۆمپانیا زەبەلاحەكانی دنیا دروستیانكردووە، جیهانگیری، كۆمپانیاكانی جیهان، ئابوری جیهان، راگەیاندنی جیهان، ئاسایشی جیهان، هەموویان دەسەڵاتی گەورە گەورە دروستیان دەكات، چ دەسەڵاتی سیاسی، چ دەسەڵاتی راگەیاندن، كە دەسەڵاتی چوارەمە، چ دەسەڵاتی ئابوری دروستیان دەكات‌و كاریگەریان لەسەر حزب، لەسەر رێكخراو، لەسەر سەندیكاو كۆمەڵ‌و لەسەر تاك، لەسەر چین‌و خێزانیش هەیە. كەواتە رەوا نییە حزب‌و دەسەڵاتی ئێمە، كە بەدرێژایی مێژوو گللەیمان لەوەبووە جیهان نەهاتووەتە ناومان پشتگیری نەكردوین، دەوڵەت‌و كۆمپانیاكان پشتیوانیان نەكردووین، بەڵام ئێستا كە جیهان گۆڕاوە، كۆمپانیاكان دێن‌و راگەیاندنی دنیاش گۆڕاوە، ئازادییەكی لیبراڵی لەهەموو دنیادا هەیە، ناكرێ‌ حزبەكان‌و دەسەڵات‌و سیستەم‌و پەرلەمانی ئێمە كۆسپبن لەبەردەم ئەم شەپۆلانەی گۆڕانكارییەكان كە دێن بەرەو وڵاتەكەمان! ئەگەر وابكەن ئەوە مەترسییەكی ئێجگار گەورەیە كە بەربەست بین لەبەردەم شەپۆلەكانی گۆڕانكارییەكان. بەپێچەوانەوە دەبێت تێكەڵی ئەو شەپۆلانەبین بەپێی تایبەتمەندییەكانی خۆمان.
بۆیە ئومێدموایە ئەم ماڵپەڕو رێكخراوانەی هەتانە لەناوچەكەتان لەرانیەو قەڵادزێ‌، لەگەرمیان، لەخانەقین، لەبادینان‌و خۆشناوەتی‌و هەر ناوچەیەك لەناوچەكانی كوردستان، ئێمەی ناچار بەشەپۆلی گۆڕانكارییەكان‌و دیاردەو دەركەوتە تازەكان كردووە.  ئێوەو مانانیش بەشێكی گرنگی ئەركەكانتان بووە بەمە گەر بتانەوێ‌ زیندوو بن، لەناو گۆڕانكارییەكان بن، لەناوچین‌و تاكەكان‌و بزوتنەوەیەكی زیندوی سەردەمەكەبن، بەشێكی ئەركەكانتان ئەمەیە. هیچ كاریگەرییەكیشتان نابێ‌ ئەگەر زمانی ئەم سەردەمە نەزانن، كە زمانی تەكنیك‌و سۆسیالمێدیا‌و پەروەردەی هاوچەرخە.

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *